Tipi-tapa, tipi-tapa, iritsi da Korrika. Iritsi da euskararen aldeko ekinbiderik entzutetsuena, bi urteko itxaronaldiaren ondoren: hain zuzen, bihar hasiko da 23. Korrika, Irunen (Gipuzkoa).
Lehen kilometroa egiteaz Bidasoko AEK euskaltegiko irakasleak arduratuko dira, eta, hortik aurrera, Harro Herri lelopean igaroko ditu 2.700 kilometro Euskal Herrian barna, harik eta martxoaren 24an Baionara heldu arte. Azterketak Euskaraz kolektiboa omenduko dute aurtengoan. Hamar gau eta 11 egun horietan, luze eta zabal jorratuko du BERRIAk, eta hasiera nahiz ibilbide guztia zuzenean jarraitzeko aukera egongo da, besteak beste.
AEK-k biharko egitarau zabala ondu du egun guztirako, baina eguerditik aurrerako zatia izango da garrantzitsuena: 15:30ean, ekitaldi nagusia egingo dute, eta 16:00etan hasiko da 23. Korrika.
