KPI %0,2 jaitsi da abuztuan Hego Euskal Herrian

KPI kontsumorako prezioen indizea %0,2 jaitsi da Araba, Bizkai, Gipuzkoa eta Nafarroan.Prezioek behera egiten duten bigarren hilabetea da segidan, uztailean ere joera hori izan baitzuten. Oraingoan, petrolioaren merketzeak eta udako merkealdien segidak eragin dute jaitsiera.

Nolanahi ere, urte hasi zenetik %1,9 igo dira prezioak Hego Euskal Herrian, eta iazko abuztuarekin alderatuta %4,8. Dena den, uztailean %5,2koa zen urte batetik besterako prezioen igoera.

Probintziaka, Nafarroan jaitsi da gehien KPI, %0,7. Araban, Bizkaian eta Gipuzkoan, berriz, %0,1 egin du behera hiruretan.

Urte hasieratik metatutako inflazioari dagokionez, %2,2koa da Gipuzkoan, %1,9koa Araban, eta %1,7koa Nafarroan eta Bizkaian.