Eusko Jaurlaritzak aurretiko baimen administratiboa onartu dio Larragorri proiektu eolikoari. Egitasmoak bost aerosorgailu eraikitzea aurreikusten du Laudioko (Araba), Amurrioko (Araba) eta Orozkoko (Bizkaia) lur eremuetan. Aerosorgailu bakoitzak bost megawatteko potentzia izango du, eta, beraz, instalazioak 25 MW ekoizteko ahalmena izango du orotara. Green Capital Development enpresa da zentral eolikoaren sustatzailea.
Baimena EAEko aldizkari ofizialean argitaratu da gaur, eta Eusko Jaurlaritzako Industria, Trantsizio Energetikoa eta Jasangarritasuna saileko Deskarbonizazio zuzendari Guillermo Allendek sinatu du.
Aldeko ebazpenari esker, Green Capitalek aukera izango du orain azpiegitura eraikitzeko baimen administratiboa eskatzeko. Hamabost hilabeteko epea izango du horretarako. Lanak hasteko, berriz, bi urte izango ditu.
Parke eolikoa eraiki ahal izateko, proiektuak bete egin beharko ditu Jaurlaritzak ingurumen eraginari buruzko adierazpenean ezarri zizkion baldintzak; besteak beste, azpiegitura ezarri asmo duten eremuan habia egiten duten hegaztiak —miru gorria, sai arrea eta sai zuria— babesteko neurriak.
Enpresak proiektuarekin aurrera egingo balu, eta eraikitzeko baimen administratiboa eskuratuko balu, Jaurlaritzak 2006tik baimendutako hirugarren azpiegitura eolikoa litzateke. Azazetako parke eolikoak eraikitzen hasteko baimena eskuratu zuen 2023an, eta Labrazakoak eraikitzekoa ere lortu zuen iaz.
