Iruñeko Udaltzaingoak jakinarazi duenez, lau gizon atxilotu dituzte asteburuan, indarkeria matxista egotzita. Sanduzelai auzoan atxilotu zuten lehenbizikoa, ortzirale arratsaldean: bikotekideari eraso egitea leporatuta atxilotu zuten, Poliziak erran duenez.
Larunbatean, berriz, bi gizon atxilotu zituzten. Arrotxapean lehenbizikoa: tratu txarren delitua leporatuta, bikotekideari kalean eraso egiteagatik. Gauerdian atxilotu zuten bigarrena, hiriaren erdigunean; sexu erasoa egin izana egotzi zioten, emazteki bati ukituak egiteagatik.
Atzo arratsaldean bertze gizon bat atxilotu zuten, emakume batengandik urruntzeko agindua urratzeagatik.
Bestalde, Gasteizko Udaltzaingoak adierazi du atzo arratsaldean 64 urteko gizon bat atxilotu zutela indarkeria matxista egotzita. Erasoa iluntzean izan zen, 20:00 pasatxo zirela, Babesgabetuen Andre Mariaren plazan; emakume batek eman zien abisua udaltzainei. Poliziak bertaratu zirenean, emakumearekin eta lekuko batekin hitz egin zuten, eta azken horrek adierazi zien gizonak zaplazteko batzuk eman zizkiola andrazkoari. Ondoren, poliziek erasotzailea atxilotu zuten.
