Espainiako Kontsumo Ministerioak Airbnb plataformari agindu dio ken ditzala 65.000 etxebizitza turistikoren iragarkiak bere webgunetik, ez dutelako araudia betetzen. Kentzeko eskatutako iragarkietatik hainbat Arabako, Bizkaiko eta Gipuzkoako etxebizitzenak dira. Madrilek zehaztu duenez, iragarkietan ez da lizentzia zenbakia ageri, ezta etxejabeen egoera juridikoari buruzko informazioa ere; beste kasu batzuetan, berriz, iragarkian ageri den lizentzia zenbakia ez dator bat Espainiako Kontsumo Ministerioak duenarekin.
Azken hilabeteetan, hiru ebazpen helarazi dizkio Madrilek etxebizitza turistikoen plataformari iragarki horiek kendu ditzan, baina hark entzungor egin dio orain arte. Airbnbk helegite bat jarri zuen ebazpen horietako baten aurka, baina Madrilgo Auzitegi Nagusiak Espainiako Gobernuari eman dio arrazoi, eta agindu dio ebazpenean jasotako 5.800 etxebizitzaren iragarkiak «berehala» kentzeko. Auzitegiaren erabakia baliatuta, Kontsumo Ministerioak beste behin agindu dio plataformaren Europako adarrari ken ditzala ebazpenean jasotako etxebizitzen iragarkiak.
Ministerioaren arabera, beharrezkoa da jakitea etxebizitza turistikoaren jabea enpresa bat ote den edo partikular bat, modu horretan jakin dezakeelako etxebizitza hartzen duenak kontsumitzaile moduan lege babesa jasoko duen edo ez.
