Espainiako Barne Ministroak onartu du 50 kilo titadine trenean sartzea zela Donostian eta Hernanin atxilotutako ETAKo ustezko bi kideek zuten helburua. Acebesen arabera, arratsaldeko 16:00ak aldera eztandarazi nahi zuten Madrileko Chamartin tren geltokian.
Espainiako Barne Ministroak esan duenez, Donostian atxilotutako Arruartek tren horretan sartu behar zuen 28 kilo titadinez beteriko poltsa. Leherkariaz gain, Arruarteri bonba indartzeko lokarri detonatzaile luze bat, tenporizadore bat, pistola bat, peluka bat eta Madrilera 15:12ean iritsiko zela jartzen zuen bidaia-txartela bat atzeman diotela esan du Acebesek. Atxiloketa unean atzeman dioten Donostia-Madril bidaia-txartela ekintza saiakera bertan behera uzteko baliagarria izan dela nabarmendu du.
Arruarte atxilotu eta berehala Gorka Loran atxilotu dute Hernanin. Acebes ministroaren arabera, Loranek lortu du tren horretan 20 kiloko lehergailua uztea. Acebesen esanetan, maleta horren barruan tenporizadore bat ere bazegoen, 15:55ean lehertzeko prestatua zegoena. Segurtasun indarrek Burgosen geldiarazi dute trena eta bigarren poltsa aurkitu eta indargabetzea lortu dute.
Acebesek baieztatu du bi atxilotuak ETAko komando legal bateko kideak direla.
Atxiloketak
Madrileko Chamartin tren geltokian lehergailu bana eztandarazi nahi zituzten Loran eta Arruartek, Acebesek adierazi duenez
Espainiako Poliziak Garikoitz Arruarte Santakruz atxilotu du gaur goizeko 11:00ak aldera Donostiako tren geltokiaren inguruetan, eta 11:30ak aldera Gorka Loran Lafourcade atxilotu du Hernaniko Felipe Sagarna kalean. Angel Acebes Espainiako Barne Ministroak adierazi duenez, Loranek 20 kilo titadinez osatutako poltsa bat sartu ahal izango du trenean, eta handik denbora batera 28 kilo titadinez osatutako beste poltsa bat sartu behar zuen Arruartek tren berean. Donostiatik Madrilera zihoan trena 20 kilo titadine barruan zituela abiatu da, eta Espainiako Segurtasun Indarrek Burgosen geldiarazi dute trena eta lehergailua indargabetzea lortu dute. Acebesen arabera, arratsaldeko 16.00ak aldera eztanda egiteko prest zegoen lehergailua. Azken orduaren arabera, Espainiako Poliziak lau etxe arakatu ditu, eta arratsaldeko bostak zirenean Gorka Loranen etxean ziren.
Iruzkinak
Ez dago iruzkinik
Ordenatu