Atxiloketak

Mailen Carrere askatu egin dute eta Askatasunaren Donibane Garaziko egoitza miatu

Askatasunak jakinarazi duenez, Maialen Carrere aske utzi dute gaur. Gainera, gaur Frantziako Polizia Askatasunaren Donibane Garaziko egoitzara sartu eta hura miatu dutela salatu dute. Esan dutenez ez dakite miaketa hori ze ordutan egin duten, eta ezta miaketara norbait eraman duten ere. Bestalde, EFE berri agentziak jakinarazi duenez, Askatasunako bozeramaile Jean Francois Lefortek Baionako komisaldegian jarraitzen du. Lefort eta Carrere atzo atxilotu zituen Frantziako Poliziak, berri agentzia horren arabera, Mikel Albisu eta Marixol Iparragirreren atxiloketekin lotuta. Atzo, biak bizi ziren etxea, Askatasunaren lehego egoitza —orain EHErena— eta Askatasunaren Baionako egoitza miatu zituzten. Atzoko miaketetan "informatika materiala eta dokumentazioa" atzeman zituztela dio iturri horrek.

2004ko abenduaren 8a

19:30

Entzun 00:00:00 00:00:00

Askatasunak salatu duenez, Frantziako Polizia Askatasunak Donibane Garazin duen egoitza miatu du gaur Frantziako Poliziak. Gainera, "hatz markak aurkitzeko frogak eginak zirela" baieztatu dute.

"Berriro ere Frantziako poliziak inpunitate osoz Askatasunako beste egoitza baten sartu dira, Perbenen azken legeek inpunitate hori legeztatu dutelako. Poliziek edozein egoitzatan sartu eta miatu dezakete. Gure lokala miatu, jakin gabe zer eraman duten, edota zer jarri diguten gure kriminalizazioa bilatzeko helburuarekin", esan dute.

EFE berri agentziak gaineratu duenez, ez dago esaterik Lefort Parisera eramango duten edo ez. Izan ere, atzo ezin izan zuen nahi bezala galdekatu Frantziako Poliziak, EFEren arabera, miaketek luze jo zutelako.

Ostiralerako manifestazio deialdia egin du Askatasunak, 19:00etan Baionako Herriko Etxe aurrean.

Aukeratu BERRIA gogoko iturri gisa Googlen. Aktibatu hemen

Iruzkinak

Ez dago iruzkinik

Ordenatu

Gehien irakurriak