Pintaketak egin dituzte Gasteizko Judimendiko parkean juduen komunitatearen omenez eraikitako oroitarrian. Yael Artsi Israelgo eskultoreak egindakoa da oroitarria; 2004an eraiki zuen, eta Gasteizen bizi ziren juduen komunitatea eta Judimendi auzoan zegoen juduen hilerria oroitzea du xede. Behin baino gehiagotan egin dizkiote pintaketak, kutsu arrazistakoak normalean; oraingoan, berriz, Israelen kontrako eta Palestinaren aldeko mezuak idatzi dituzte, zehazki: Genozidak, Gora Palestina eta Hamas, hil itzazu esaldiak agertu dira.
Gasteizko Udalak adierazpen instituzional bat egin du, eta «intolerantzia eta gorroto adierazpentzat» jo ditu pintaketak: «Gure hiriaren memoria historikoari eta bizikidetza demokratikoari egindako errespetu falta larria da». Adierazpena EAJ, PSE-EE eta PP taldeen botoekin onartu da: EH Bilduk kontra bozkatu du, eta Elkarrekin Podemos abstenitu egin da.
EH Bilduk, ohar batean, «onartezintzat» jo ditu pintaketak, eta, aldi berean, Israel Gazan egiten ari den «genozidioa geldiarazteko» deia egin du.
Gasteizko Udalak hesiak jarri ditu eskulturaren inguruan, eta hura garbitzeko enpresa bat kontratatuko du. Orain arte egindako garbiketa lanek kalte handiak eragin dituzte oroitarrian, eta 2023an udalak 9.000 euro erabili zituen hura lehengoratzen.
