PSE-EEk, EAJk eta EH Bilduk aurkeztu dute mozioa, eta horien eta Javier Maroto legebiltzarkide eta Gasteizko alkatearen aldeko botoarekin atera da aurrera. Marotok PPren diziplina hautsi du, eta berak soilik bozkatu du Garoñaren jarduera etetearen alde. PPko beste bederatzi parlamentariek eta Gorka Maneiro UPDkoak kontra bozkatu dute.
Behin baino gehiagotan mintzatu da Maroto Garoñako zentralaren aurka, eta, bozketaren ondoren adierazi duenez, "koherentziagatik" bozkatu du jarduera etetearen alde. "Batek gauza bat pentsatzen duenean hori defendatu behar du foroa edozein delarik ere. Garoña ixtearen alde nago ni, eta hori defendatuko dut hemen, kalean eta edozein lekutan".
Nafarroako Parlamentuak ere eskatu dio Espainiako Gobernuari Garoñako zentrala ixteko. Landa Garapen, Ingurumen eta Tokiko Administrazio Batzordean onartu dute eskea, PSNk, Bilduk, Aralar-NaBaik eta Ezkerrak alde bozkatuta. Abstenitu egin da UPN.
"Egiazko arriskuak" argudiatu ditu Ezkerrak, eskaeraren sustatzaileak, eta nabarmendu du zentrala "estatuko zaharrena" dela eta "zortzi istriputik gora" izan dituela.
