Miarritzeko (Lapurdi) Mouriscot aisialdi zentroko bi animatzaile atxilotu dituzte gaur goizean Baionan, haurrak bortxatu eta haien kontra sexu indarkeria baliatzeaz akusaturik: 21 urte ditu atxilotuetako batek, 36 besteak, eta 3 eta 4 urte arteko hamahiru haurri sexu erasoak egitea leporatzen diete. Gertakariak aurtengo uztailaren 6tik eta 17ra bitarte iragan dira.
Mementoko, lau salaketa aurkeztu dira, eta bortxaketa kasu bat dago tartean. Ez dute xehetasunik eman sexu indarkeriako beste kasuen inguruan. Baionako prokuradorearen bulegoak azaldu duenez, bi gizonak galdekatu dituzte, eta behin-behineko atxiloaldian daude orain.
36 urteko animatzaileari dagokionez, bi urte dira lanpostu horretan ari dela; 21 urteko animatzaileak, berriz, udako lana zuen. Gaur egun eskura duten informazioarekin ezin omen dute argitu bi gizonak hitzartuak zirenetz erasoak egiteko.
,Magistratu arduradunak aitortu du «afera biziki konplikatua» dela, biktimen adinagatik. Erraterako, hain gazte direlarik, haurrek zailtasunak dituzte erasoak kontatzeko. Orain arte, hamahiru haurretarik lau entzun dituzte lanjerean diren haurren artatzeko Baionako ospitaleko zerbitzuan, eta gai horietan espezializaturiko psikologo batekin egonak dira.
Serge Blanco Miarritzeko auzapezak biktimen gurasoei gutun batean adierazi dienez, bi gizonak kargutik kendu dituzte ikerketen berri ukan bezain laster. Bestalde, erran die Miarritzeko herria parte zibil gisa aurkeztuko dela auzibidean.
Gertakizunen larritasuna dela eta, gaurdanik entzute zerbitzuak plantan ezarriko dituzte herriko etxean, gurasoek parada izan dezaten psikologoengana joateko.
