ICI irratiak emandako informazioaren arabera, Baionako Fiskaltza martxoan gertatutako talde bortxaketa bat ikertzen ari da. 17 urteko neska batek salatu duenaren arabera, martxoaren 12ko gauean hiru gizonen artean bortxatu zuten Miarritzen (Lapurdi), sumisio kimikoa erabilita. Oroitzen duenez, bi mutilek indarrez atxiki zuten, eta beste batek bortxatu zuen. Horren aurretik, diskotekan edari bat hartu, eta nabaritu zuen zorabiatuta zegoela; horregatik atera nahi izan zuen haizea hartzera, eta orduan atxiki zuten.
Neska Percent jaia ospatzen ari zen, ikaskideekin batera; ohikoa da lizeoko azken urteko ikasleek baxoa baino ehun egun lehenago festa bat egitea, eta Miarritzeko hondartzaren inguruan ospatu zuten.
Antza, hiriko kameren bidez ezin izan dituzte identifikatu erasotzaileak, eta diskotekaren grabazioak ezabatu egin dituzte; beraz, DNA probak izango dira gakoa. Erasoaren ostean, Baionako ospitaleko biktimologia unitatera eraman zuten neska.
