Ekainean izanen da. Nafarroako Gobernuko Barne kontseilari Maria Jose Beaumontek iragarri duenez, hil honetan aurkeztuko dute suhiltzaileen lan eskaintza publiko berria. Ez du argitu, ordea, zenbat lanpostu eskainiko dituzten. Kontseilariaren esanetan, deialdi horren helburua izanen da "aurreko gobernuaren kudeaketa kaskarrak eta diru xahutzeak eragindako gabeziak" konpontzea. Nafarroako Legebiltzarrean eman ditu azalpenak.
Gaur egun, 347 suhiltzailek osatzen dute "operazio zerbitzua" —horiez gainera, administrazio lanetan dira 55 urtetik gorako 47 suhiltzaile—, eta kopuru hori "segurtasun arauek ezartzen duten gutxienekotik urrun" dagoela adierazi dute zerbitzuko buruek. Gutxieneko zerbitzua bermatu ahal izateko 378 suhiltzaile beharko liratekeela gogoratu dute, "baina egokiena 388ra iristea litzateke". Lan deialdi berriari eta abian den beste LEPari esker kopuru horretara iristea espero dute.
Victor Rubio suhiltzaileen zerbitzuburuak, bestalde, bere dimisioaren arrazoiak azaldu dizkie legebiltzarkideei: "Zerbitzua berregituratzeko plangintza bat jarri genuen martxan, eta porrot egin duela ikusita, lekukoa beste norbaiti pasatzea erabaki dugu, normaltasun osoz. Politikan ere halako dimisio gehiago eginen balira, ez ginateke egoera honetan egonen".
