Nafarroako Jauregiko aurrealdean ageri den gurutze ereñozduna edo laureada kentzea erabaki du Nafarroako Gobernuak gaur egin duen bileran. San Fernandoren gurutze ereñozduna Franco diktadoreak Nafarroako armarriari erantsitako ikurra da, herrialdeko erreketeek eta falangistek 1936ko gerran izandako paperaren esker onez. 1951tik dago sinboloa Nafarroako Jauregiko paretan, Fructuoso Orduña eskultore nafarrak egindako frisoaren barruan.
Hura kenduta, Oroimen Historikoaren Legea beteko du Nafarroako Gobernuak. Hain justu, lege hori betetzeko 12.000 euroko diru saila sartu zuten aurtengo aurrekontu proiektuan.
