"Gaixotasun larriak dituzten presoentzat irtenbide humanitario hutsa ematea". Hori da joan den ostegunean Nafarroako Parlamentuan onartutako mozioak eskatzen zuena. PSN, Geroa Bai, EH Bildu, Podemos eta Izquierda-Ezkerra taldeetako botoekin egin zuen aurrera. Orain, Nafarroako sindikatuak izan dira mozioarekin eta haren edukiarekin bat egin dutenak: UGT, CCOO, ELA, LAB, EHNE, Steilas, ESK, Hiru, Solidari eta CGT.
Foro Sozial Iraunkorraren ekimenez babestu dute mozioa sindikatuek. Joan den maiatzetik ari da Foro Soziala Nafarroako Gobernuarekin, alderdiekin eta sindikatuekin bilerak egiten, eta halaxe nabarmendu du orain: "Kontaktu hauen guztien ondorioz, esan dezakegu Nafarroako gehiengo instituzional, politiko, sindikal eta soziala, gaur egun, presoak gizarteratzeari buruzko problema konpontzeko jokaleku berrian sartzearen alde dagoela".
