Geroa Bai koalizioak larunbatean Kontseilu Nagusiaren batzarra egingo du Iruñean, "Nafarroaren norabide politikoa berreskuratzeko" asmoz, Uxue Barkos diputatuak esan duenez. Zuzendaritzak prestatu duen txosten bat bozkatuko dute batzarkideek. Ontzat joz gero, datozen hilabeteetan ekintza plan bat garatzen hasiko da Geroa Bai, "politika plazara" eraman nahian.
Barkosen arabera, Europako Legebiltzarrerako hauteskundeetan gizarteak "sistema aldatzeko eta erabakiguneetan parte hartzeko" eskatu zuen. Hala, Nafarroako koalizioak gizartearekin egitasmoa "partekatu" nahi du. Egun Nafarroan "geldirik" ikusten ditu erreforma fiskala, itun ekonomikoaren gaurkotzea, ikerkuntza eta nazioartekotzea.
Baluarte jauregian egingo dute bilkura, goizeko hamarretatik aurrera. Geroa Bairen Kontseilu Nagusiaren hirugarren batzarra izango da. Laurogei lagunek osatzen dute Kontseilu Nagusia, eta koalizioaren organu gorena da.
