Duela hogeita bost urte argitaratu zen Bernardo Atxagaren Obabakoak lana. Ordura arte, euskal literaturak eman gabe zuen nazioarterako pausua emanez. Hori ospatzeko, Bilbo Zaharra euskaltegiak egun osoa iraun duen liburuaren irakurketa jarraia egin du Arriaga antzokian.
Goizeko zortzietan hasi du irakurketa Bernardo Atxagak bera, liburuaren lehen esaldiak irakurriz. Beste 400 lagun inguruk hartu diote ondoren lekukoa. Tartean izan dira Andres Urrutia euskaltzainburua, Anjel Alkain aktorea, Patxi Baztarrika Eusko Jaurlaritzako Hizkuntza Politikarako sailburuordea, Unai Brea kazetaria, Ander Iturriotz Euskal Idazleen Elkarteko lehendakaria eta Unai Sordo CCOO-Euskadi sindikatuko idazkari nagusia. Parte hartzaile gehienek egilearen idazkeraren naturaltasuna nabarmendu dute.
