EUSKAL PRESOAK

Oier Oaren defentsak helegitea aurkeztuko du, "boterekeria" salatzeko

Manifestaziora deitu dute biharko Larresoron (17:00).

Oier Oaren egoeraren berri eman zuten martxoaren 28an eginiko agerraldi batean. BOB EDME
2015eko apirilaren 10a
14:32
Entzun

Apirilaren 4an zen libre geratzekoa Oier Oa euskal presoa, baina haren defentsak ohartarazi du Frantziako auzitegiak mezu kontrajarriak bidali dizkiola. Parisko Dei Auzitegiak debekatu egin dio libre geratzean Frantziako Estatuan egotea, eta Versallesko Dei Auzitegiak, ordea, uko egin dio Oa Espainiaratzeari. Hori horrela, Paris ondoko Yvelines departamenduko Saint-Germain-en-Laye herrian finkatu diote obligaziozko bizilekua, Larresoron ezarri beharrean.

Erabaki horrek "irregulartasunak" dituela uste  du defentsak, eta helegitea iragarri du. "Boterekeriaz" jokatu delakoan, Parisko Administrazio Auzitegian aurkeztuko dute errekurtsoa. Epaileak onartuz gero, bertan behera geratuko litzateke Oari bizilekua Paristik gertu ezartzeko erabakia.

Defentsak salatutako irregulartasunen artean dago prefetak ez diola leku zehatzik ezarri bizileku gisa; hala egin behar dela dio legeriak, abokatuaren arabera. Senideak eta lantokia Euskal Herrian dituela-eta, Oari Larresoron bizitzea onartzea nahi du defentsak.

Haren egoera salatzeko, manifestazioa antolatu dute biharko Larresoron.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.