Gasteizko Lehen Instrukzio Epaitegiak sei hilabeteko espetxe zigorra eta 1.080 euroko isuna ezarri dizkio Osakidetzako segurtasun buru ohiari, kargua eskuratzeko unibertsitateko titulu faltsu bat aurkeztu zuelako. Faltsutze delitu batengatik zigortu dute.
Sententziaren arabera, auzipetuak «jakinaren gainean eta borondatez» aurkeztu zuen EHUren Publizitate eta Harreman Publikoetako lizentzia baten ustezko titulazio ofizialaren kopia konpultsatua, nahiz eta agiria faltsua izan. Osakidetzako Zuzendaritza Nagusiko Segurtasun saileko arduradun lanpostua betetzeko hautaketa prozesuan aurkeztu zuen dokumentua, 2023an. Titulazio horri esker lortu zuen kargua, eta 2023ko azaroan hasi zen lanean. 2025eko abenduan kargutik kendu zuten.
Fiskaltzaren eskaerarekin bat egin zuen auzipetuak epaiketan, eta eskatutako zigorra onartu zuen. Adostasun horren ondorioz, hasieran haren aurka eskatutako zigorra murriztu egin zuten, eta, alde guztiek helegitea jartzeari uko egin ziotenez, epaia irmo bihurtu da orain.
Espetxe zigorrari dagokionez, epaitegiak bi urtez eten du haren betearazpena, baldintza batekin: epe horretan zigortuak ezingo du beste deliturik egin. Baldintza hori urratuko balu, epaitegiak etenaldia indargabetu eta espetxe zigorra betearazteko agindu ahal izango luke.
