Ostadarraren koloreek tindatu dute gaurko eguna

Gaur, LGBT Lesbiana, Gay, Bisexual eta Transexualen Harrotasunaren Nazioarteko Eguna dela eta, arratsean berriz ere euren aldarriak kalera atera dituzte Euskal Herriko gay, lesbiana, bisexual eta transexualen elkarteek.

Adibidez, Gasteizko Transmarikabollo mugimenduak kolektibo horiek alderdi politikoen nahiz erakundeen aldetik jasaten dituen "instituzionalizazio eta otzantze saio etengabeak" salatzeko baliatuko du gaurko eguna. Haien arabera, "pozoitutako gozokiak" eskaini zaizkie, "ustezko" berdintasuna oinarri hartuta.

Gehituk, berriz, urteroko Zilarrezko Gehitu saria CEAR Errefuxiatuen Laguntzarako Espainiako Batzordeari eman zion aurreko asteazkenean, arrazoi sexualak direla medio bazterkeria juridikoa, politikoa eta soziala pairatu duten pertsonen alde egindako lanagatik. EHGAMek gaur jakinaraziko du nori emango dizkien aurtengo Urrezko Hirukia eta Trapuzko Espartina sariak.

Bilgune Feministak "heteronorma hausteko" deia egin du. "Norma horrek aukera bakarrera mugatzen gaitu; eta, gainera, eredu hori guztiz da genitala, koitala, bi pertsonen artekoa, eta gizonen plazerera bideratuta dago". Hala, lesbianen zein transexualen ikusgarritasuna bultzatzeko eta haiek jasaten dituzten "epai sozialak" gainditzeko eskatu dute. Horretarako, gaurko manifestazioetan parte hartzera deitu dituzte herritarrak.

Amnesty International (AI) erakundeak ere dei egin du gaurko egunaren harira antolaturiko ekitaldietan parte hartzera. AIk bereziki ohartarazi du transgenero pertsonek munduko hainbat lekutan pairatzen duten egoeraz.