Atzo goizean, Durangoko (Bizkaia) Azokaren bezperan, pintaketa neonaziak agertu ziren Landako gunearen inguruan. Zenbait eragilek —tartean azokaren antolakuntza, GKS eta Ernai— pintaketak salatu zituzten, eta segituan estali. Azokaren sare sozialetan dei egin zuten halako mezuen aurrean batzeko: «60 urtez izan gara hemen, eta ibilbide horri eutsiko diogu. Batu gaitezen euskal kulturaren eta aniztasunaren alde!».
Aste honetan euskal kulturaren epizentroa izango den gunearen inguruan, «14-88» [Zurien supremazismoaren lelo bat], «White pride» [Harrotasun zuria] eta halako mezuak irakur zitezkeen. GKSk, pintaketak salatu, eta biharko antolatuta duen mobilizaziorako deia egin du.
⚠️⚠️⚠️ADI PINTADA FAXISTAK DURANGON⚠️⚠️⚠️
— Durangaldeko GKS (@GKS_Durangaldea) December 4, 2025
Gaur goizean pintada faxistak agertu dira Durangon Atzoko eta gaurko Faxismoa borrokatu! Abenduak 6 Durangora. pic.twitter.com/9KwmlbIvpM
Durangoko Ernaik ere hirian agertutako pintaketak gaitzetsi ditu; mezu supremazistak tapatu, eta alboan antifaxistak idatzi dituzte: «Ekinez egina, Euskal Herria antifaxista».
