Jakina zen bezala, Espainiako Kongresuan gaur eratu duten lurralde batzordea EAJ eta EH Bildu gabe. Bi alderdiek esana zuten batzorde horrek ez dituela konponduko Kataluniako eta Euskal Herriko gatazka politikoak, eta ez diola irteerarik emango erabakitzeko eskubideari. Zalantzarik balego ere, halaxe argitu du PPk, Konstituzioa aldatzeko asmorik ez duela ohartarazita.
Jose Antonio Bermudez de Castrok esan du hori gaur. "Estatu autonomikoa modernizatzeaz eta ebaluatzeaz hitz egitera gatoz, inork ez dezala beste ezer espero".
Aitor Esteban jeltzalearen arabera, berez, ekimen ona da lurralde batzordearena, baina, hau ez da une egokia horretarako. Katalunian 155. artikulua aplikatuta dagoenez, tentsioa maila gorenean dagoela ohartarazi du. Eta gogora ekarri du, hauteskunde kanpainaurrean direla Katalunian. Horregatik, ez dela batzorde horrentzat une egokia nabamendu du. "Elkarrizketari atea irekitzea beti da baikorra, baina klima ez da egokia parte hartzeko eta aurrerabidea egoteko", esan du Estebanek. Geroago batzordera batzea ez dute baztertzen jeltzaleek.
Marian Beitialarrangoitia EH Bilduko diputatuak salatu du batzorde horrek ez diola konponbiderik emango erabakitzeko eskubideari. Alderantziz, aurrerapausoak eman beharrean atzerakoak emateko bakarrik balio dezake, bere arabera. "Erabakitze eskubideari zirrikiturik txikiena itxi nahi dio".
