«Martxoaren 9ko gauean, zurezko hil kutxa bat aurkitu da Beskoitzeko herriko etxearen aurrean, 'Euskara?: 2040' idazkia zekarrela», dio Julien Charles Paueko prefetak eta Alain Sanz auzapezen departamenduko elkarteko lehendakariak izenpetu agiriak. «Fermuki kondenatzen» dute «errepublikako hautetsi batzuen larderiatzeko ekintza hori».
Beskoitzeko ikastolaren eta herriko etxearen arteko gatazkarekin lotu dute ekintza, eta gehitu dute «tokiko demokrazia errespetatu behar dela», baina hori «errespetuzko eztabaida sano» batean eginez, «gehiegikeriarik, eraso apalgarririk edo difamatzailerik onartzen ez duen esparru errepublikano batean». Prefetak eta departamenduko auzapezen elkarteburuak agiria bukatu dute «sustengu guzia erakutsiz Beskoitzeko auzapezaren eta kontseiluko hautetsien aldera».
Hilkutxaren irudi sinbolikoa mobilizazio frankotan erabili da sail, egitura eta izate baten heriotza irudikatzeko. Adibidez, Baionan berean, 2016an, lan legearen kontra langile sindikatuek antolatu mobilizazioen karietara, hilkutxa bat ezarri zuten Baionako herriko etxearen aitzinean, «lan kodearen heriotza» irudikatzeko. Berrikiago, 2019an, Baionako Ospitaleko langileen greba eta mobilizazioen karietara, hango langileek hilkutxa bat ezarri zuten Baionako suprefeturaren aitzinean, ospitale publikoaren heriotza irudikatzeko. Ez zen orduan prefeturatik agiririk iritsi irudi sinbolikoaren salatzeko.
Azken adibidea Frantzian zehar izan diren laborarien mobilizazioetakoa izan da, non hilkutxa sinboliko anitz baliatu baitira ekintzetan.
Asteburu honetan, Beskoitzen, Non eta Mugan topaketa antolatu zuen Ikastolen Elkarteak.
