Eskubide guztiekin euskal presoak Euskal Herrira goiburupean bihar Bilbon egingo den manifestazioari babesa eman diote hainbat eragilek. Alderdien aldetik ezker abertzaleak, Eusko Alkartasunak, Alternatibak, Aralarrek zein Abertzaleen Batasunak eman diote atxikimendua, eta sindikatuei dagokienean, ELAk, LABek, EILASek eta EHNEk. Horiez gain, Lokarrik, Iratzarrik, Gazte Abertzaleek, Ikasle Abertzaleek, GaztEHerriak, Euskal Herriak Bere Eskolak, Bai Euskal Herriari-k, EHEk, ESAITek eta Oroimen Historikoa Berreskuratzen-ek ere euren babesa eman diote Egin Dezagun Bideak antolatutako manifestazioari.
Martxa 12:30ean abiatuko da Guggenheimetik, eta ondoren, egun osoko ekitaldi berezia egingo dute udaletxearen inguruetan. Musika kontzertuak eta antzerkia egongo dira.
Espainiako Auzitegi Nazionaleko Pablo Ruz epaileak baimena eman du manifestazioa egiteko, baina «terrorismoa goratzeko» ekimenik egongo den zaintzeko eskatu dio poliziari. Dignidad y Justicia elkarteak protesta debekatzeko eskatu zuen.
Lokarrik Espainiako gobernuburu Jose Luis Rodriguez Zapaterori eskatu dio «aukeren unea» aprobetxatu eta «bakearen alde bere ekarpena» egiteko. Bere iritzian, espetxe politikan aldaketa egiteak «konfiantza gehiago sortzeko» balioko du. Lokarrik bihar Bilbora joateko deia egin die herritarrei.
Presoen eskubideen aldeko biharko martxa babestu dute hainbat eragilek
Pablo Ruz epaileak manifestazioa egiteko baimena eman du, baina zaintzeko eskatu die segurtasun indarrei
Iruzkinak
Ez dago iruzkinik
Ordenatu
