PSE-EEk kanporatzeko espedientea ireki dio Ermuko zinegotzi Pedro Gallegori. PSEk jakin du bikotekideari eraso egin ote dion ikertzen ari dela Ertzaintza. Hori dela eta, PSEko idazkari nagusi Eneko Anduezak jakinarazi du Gallego alderditik kanporatzeko espedientea zabaldu dutela.
Gaur goizean Eusko Legebiltzarrera iritsi denean, Anduezak esan du alderdiak «berehala» esku hartu duela auzi honetan. «Kasu hauetan egin behar den moduan», gehitu du sozialisten buruak. «Horrelako kasu batean, ezin da beste era batera jokatu: zinegotziaren agiria itzultzeko eskatu eta kanporatzeko espedientea zabaldu».
Anduezak azpimarratu du bere alderdiak «oso argi» duela «jarrera horiek» ez direla onartzen alderdi barruan. Ermuko alkate sozialista Beatriz Gamizek zinegotzi agiria itzultzeko eskatu dio Gallegori.
