PSEk dio EAJk eta biek etzi lortuko dutela Bakerako Hezkuntza Planaren akordioa

Jose Antonio Pastor PSE-EEko bozeramaileak gaur iragarri du ekainaren 11n aurkeztuko dutela Bakerako Hezkuntza Plana Eusko Legebiltzarrean, horretarako nahikoa babes izango dutela iritzita. Izan ere, Pastorrek jakinarazi du astelehenean akordioa lortuko dutela EAJrekin. "Akordio handia izateko baldintzak daude orain", adierazi du bozeramaile sozialistak. Eusko Jaurlaritzak maiatzaren 31 jarri zuen azken egun gisa akordioa lortzeko.

Bi taldeek herenegun Legebiltzarrean egindako bileran, EAJk mahai gainean jarritako testua izan zen negoziazioaren ardatza, eta BERRIAk jakin ahal izan duenez, adostasuna izan zen jeltzaleen printzipioen inguruan.

EAJrekin "ezustean" ados ez badira jartzen, Jaurlaritzak egitasmoarekin segituko duela ziurtatu du Pastorrek, eta beste alderdi batzuekin ere egin nahi dute akordioa. "Alderdien lehiak albo batera utzi behar dira, bizikidetza demokratikoari eusteko".