Frantziako Villefranche Sur Saoneko espetxean daude Ruben Ribero, Ibon Goieaskoetxea eta Julen Mujika euskal presoak "bortizki jipoitu" dituztela salatu du Etxerat-ek.
Elkarteak azaldu duenez, igandean, "funtzionarioen talde bereziak sartu ziren, kaskoz eta armez hornituak, hiru euskal presoen ziegetan, eta bortizki jipoitu zituzten, presoei zauriak eraginez. Jarraian, zigor ziegetara eraman zituzten eta inkomunikatuta daude ordutik". Goieaskoetxeak senideekin hitz egin omen du, baina inork ez du Riberoren eta Mujikaren berririk.
Espetxeko funtzionarioen jarrera euskal presoekiko "bereziki bortitza" dela gaitzetsi du Etxerat-ek. Gainera, senideen bisitak debekatzeko mehatxua erabiltzen dute funtzionarioek, elkartearen esanetan.
