Abiadura Handiko Trena egiteko lanetan zundaketa geologikorik ez egiteko eskatuko du Stop AHT Zundaketak ekinaldiak, AHTaren aurkako zenbait plataformak osatutakoak. Sakana, Arabako Lautada eta Goierri lotuko dituen ibilbidea osatuko dute hiru egunez, bizikletaz. Zundaketek, eta, oro har, AHTa eraikitzeak «inpaktu kate bat» dakartela salatu nahi izan dute: «ingurumen inpaktuak, herri eta lurretan izango duen eragina, xahutze ekonomikoa, ohiko trenaren desegituratzea eta honen zerbitzuak hobetzeari uko egitea, eta, ondorioz, enpleguak galtzea. Eta honen guztiaren lehen urratsa esplorazio zundaketak dira».
Abuztuaren 25an (ostirala) hasiko dute ibilbidea Irurtzunen, eta handik Olatzagutira joango dira ekinaldira deitutakoak. Aguraindik irtendako beste txirrindulariekin bat egingo dute han, eta gauez kontzertuak egingo dira Olatzagutiko gaztetxean. Hurrengo egunean Altsasura abiatuko dira, eta martxak Zegama, Segura, Beasain eta Lazkao zeharkatuko ditu, iluntzean Ataunera iritsi arte. Geralekuetan langileekin eta sindikatuekin bilkurak, elkarretaratzeak eta batzar irekiak egitea aurreikusi dute antolatzaileek.
Ataundik Irurtzunerainoko bidea egingo dute igandean, eta orduan amaituko da martxa; bidean zehar, Lakuntzan eta Uharten egingo dituzte geldialdiak. Herri bazkariarekin amaituko dute ekinaldia.
