Auzia artxibatu dute. 2016ko sanferminetako talde bortxaketaren biktima zelatatzeagatik jarritako salaketa bertan behera uztea erabaki du Madrilgo 40. Instrukzio Epaitegiak, behin-behinean. Enrique de la Hoz epailearen aburuz, detektibe agentziak ez zuen «emakumearen intimitatea urratu», ezta «sekreturik argitara eman» ere. Ez dute, beraz, deliturik antzeman. El Periódico berripaperak eman du erabakiaren berri.
Talde bortxaketagatik zigortutako gizonetako batek –Alfonso Cabezuelo militarrak— kontratatu zuen Cassol detektibe agentzia 2016ko udan, ustez, erasoa jasandako emakumeak «bizimodu normala» zeramala frogatzeko. Argazkiak egin zizkioten andreari, lagunekin eta senideekin zegoela, eta horiekin, txosten bat aurkeztu zuten auzitegian. Detektibeen txostenean nabarmentzen zen, besteak beste, emakumeak «erretzen zuela, parrandan ateratzen zela eta lagunekin kafea hartzen zuela».
Biktimaren defentsak helegitea aurkeztu diezaioke epaiari.
