Irrigarritzat jo du koalizioaren barrenean izan den erantzuna. «Batzuek diote Batasuna Nafarroa Bain sartzea presazko erabakia dela; beste batzuek, ez dela une egokia; eta beste batzuek esaten dute beste subjektu bat osatu nahi dutela», adierazi du Sanzek. Hala, zeharka, Nafarroa Baiko printzipio politikoak Alderdien Legearekin bateragarri ez direla iradoki du: «Guk diogu Alderdien Legea bete behar dutela, eta ez NaBaiko printzipioak».
Sanzek ezker abertzaleari azaldu dio legezko izateko zer neurri hartu behar dituen: «Batasunak ETAri eskatu behar dio armak utz ditzala, terrorismoa gaitzetsi behar du, legearen betekizunen menpe jarri behar da; hori da egin behar duena». Gaur-gaurkoz bere ikuspuntutik ez dela baldintza bakar bat ere betetzen arrazoitu du. Hala, ezker abertzaleak orain arte egindako urratsak ez ditu aitortu: «Kontua da Batasunak ETA ez duela gaitzesten, indarkeria utz dezala eskatu gabe jarraitzen du, eta egin asmo duen bakarra da Nafarroa Bai koalizioan sartzea kide independenteen bidez edo beste formula baten bidez».
Oso kritiko azaldu da Nafarroa Bairekin. Hala, «ideologia duen alderdi bat» izan ordez «hauteskunde plataforma bat» dela iritzi dio: «Helburu bateratu batekin bertan biltzen eta nahasten dira hainbat ideologia. Helburu hori da UPN Nafarroako Gobernutik ateratzea. Horregatik, ez dakit zergatik asaldatzen diren hainbeste gure helburua abertzaleak gobernura ez iristea dela aldarrikatzen dudan bakoitzean», esan du Sanzek.
Ohartarazpena EAri
1996tik hamaika bider entzundako mezua errepikatzeari ekin dio, horrenbestez: «Nafarroak Nafarroa izateari utzi eta beste proiektu instituzional batekin bat egitea bilatzen dute. Horrek Nafarroa erkidego bereizi izateari utziko lioke, Euskadirekin bat egiteko edo beste proiektu diferente batekin bat egiteko». Nafarroa Baiko alderdien artean, EArekin azaldu da bereziki kritiko. «Ez eskuinean ez ezkerrean dagoen» alderditzat jo du: «Edozein modutan, gaur egun alderdien legea betetzen ez dutenekin bat egiteko asmoa azaltzen dute».
Patxi Zabaleta Nafarroa Baiko eledunak, berriz, azaldu du Nafarroa Baik «ateak irekia» dituela koalizioaren «printzipio, egitura eta programak sinatzen eta iradokizunak eginez bat egin nahi dutenentzat». Batasunari erantzunez, Zabaletak gaineratu du gainontzeko guztia «errespetagarria» dela. Hori bete ezean, lehia demokratikoa iragarri du.
Aralar eta independenteak
Ezker abertzalearen proposamenak ez ezik, beste gai batek hautsak harrotu ditu koalizio barruan. Independente talde batek alderdiei foru hauteskundeetarako hautagai bateratu bat aurkeztea proposatu zuen osteguneko bileran: Uxue Barkos da euren hautagaia. Berez, Aralarri dagokio hautaketa, eta militanteek Patxi Zabaleta hautatu dute jada. Ezkerreko Nabaizaleokwebgunean, besteak beste, gehiegizko protagonismoa hartu nahi izatea egotzi diote bi blogarik Barkosi.
Hori dela-eta, independenteen gestora batek ohar batean kaleratu du akusaziook «bidegabeak eta desegokiak» direla. Zilegitzat jo dute Barkos hautagai gisa proposatu nahi izatea, «nabaizale gehienen iritziz hautagai posible onena» delako. Egungo egongaiztasun handiaren arduradun ez direla sentitzen dute; izan ere, euren ustez, EAren eta Aralarren arteko akordioan koalizioaren jatorrizko printzipioak desitxuratuz geroztik ildo hori zuzendu behar dela diote. «Batez ere jarrera intolerante eta harroak alboratu behar dira».
Aralarren erantzuna berehalakoa izan da. Mikel Azkona antolamendu idazkaria harrituta agertu da gestora horrek «umiltasun eta autokritika» falta erakutsi duelako: «Baina bereziki harritzen gaitu bere burua gestoratzat duen Independente talde horrek Aralarren, EAren eta EAJren akordioetan oinarrituta altxatzen ari den koalizio ereduarekin urrun daudela adierazi duelako». Artikako batzarra geroztik Independente taldeak helarazitako proposamenen %80 onartu duela Aralarrek azaldu du. «Eztabaida lasai eta ireki baterako nahia ere erakutsi dugu».
