Sarako (Lapurdi) Euskal Idazleen Biltzarrean egindako agerraldian ikastolak "alerta gorrian" daudela ohartarazi du Paxkal Indo Seaskako presidenteak. Azaldu du abenduan eta urtarrilean izandako bileretan Errektoradutzak —Hezkuntza Ministerioaren egitura, eskualdean— bigarren mailarako irakasle postu berriak bere gain hartuko zituela esan ziela.
Lehen mailetarako, berriz, 4,5 postu berri hitzeman zizkien Pierre Barriere Pirinio Atlantikoetako Akademia ikuskariak. "Martxoko bilkuran, Akademia inspektoreak eta Errektoradutzak heldu den sartzerako guretako zero postu dituztela adierazi digute, bilkura eta negoziaketak bertan behera geldituz".
Indok ohartarazi du egoera horretan hiru ikastolatik bi kaltetuak izanen direla: "Lehen mailetan 29 ikasleko taldeak izanen lirateke, eta lekuka 50 ikasle ere. Lizeoan, 39ko taldeak genituzke, eta, kolegioetan, 36, 38 eta 47ko taldeak ere. Ikastolak Laborantza Ministerioaren menpeko ezarri nahi ote dituzte, hezkuntza ordez hazkuntza intentsiboa egin dezagun?".
Hezkuntza Ministerioaren eta haren ordezkarien jarrera aldaketa lortu arte, mobilizazioak hasiko dituztela iragarri dute: lehen protesta maiatzaren 4ko arratsaldean egingo dute.
