Seaska Lapurdi, Nafarroa Behere eta Zuberoako ikastolen elkarteak manifestazioa antolatu du hilaren 30erako (larunbata), Frantziako Gobernuko Hezkuntza Ministerioak behar adina irakasle jartzen ez dizkiola salatzeko. Ikasturte bakoitzeko 150-200 ikasle gehiago ditu Seaskak, gaur berak esan duenez, baina egun hamazazpi irakasleren soldatak elkarteak berak ordaintzen ditu eta ez Hezkuntza Ministerioak.
Datorren ikasturterako beste bost irakasle beharko dituela aurreikusia du Seaskak, eta uste du horien soldatak ere berak ordaindu beharko dituela. "Egoera larria da", adierazi dute gaur, Baionan.
Lapurdiko hiriburuan bertan izango da manifestazioa, baina oraindik ez dituzte jakinarazi ordua eta lekua.
