Beste urte batez, gaur hasi eta ostegunera bitarte ehunka ikasle elkartuko dira Hego Euskal Herriko campusetan unibertsitatera sartzeko probak egiteko. Norberaren jakintza eta gaitasun mailaren adierazle ez, IAS Ikasle Antolakunde Sozialistak uste du selektibitatea eta baxoa «filtro sozialerako tresna» direla, eta gaur goizaldean horien aurkako zenbait ekintza egin dituzte Hego Euskal Herriko hainbat campusetan: seleari su eman diote, eta unibertsitatera sartzeko «eredu berri bat» aldarrikatu.
Bi ikasturtetan ikasitakoa zenbait egunetako azterketa sortan erakustean datzate selektibitatea eta baxoa. IASren arabera, froga horiek ikasleen «etorkizun akademikoa baldintzatzen» dute, eta haien arteko «indibidualismoa eta lehiakortasuna» sustatzen dituzte, argudiatuta helburua ahalik eta «posturik onena» lortzea dela, eta horrek gainontzeko ikasleak «etsai» gisa identifikatzea eragin dezakeela.
Azterketa horiek ikasleen buru osasuna «nabarmen» kaltetzen dutela ere salatu du antolakundeak. Are, gaur zabaldutako prentsa oharraren bidez kontatu duenez, ikasleen ezinegona eta lan karga areagotu egin dira azken bi urteotan, selektibitatearen «aldaketa fase batean» murgilduta daudelako.
Baxoa ere jopuntuan
Hego Euskal Herrian gaur hasi eta ostegunean bukatuko dira unibertsitatera sartzeko probak; Ipar Euskal Herrian, berriz, ekainaren erdialdean egingo dituzte. IASk hango ikasleen egoera ere salatu du, eta gogorarazi urtero «ukatzen» zaiela azterketa guztiak euskaraz egitea.
Halere, haien borrokak izan du lorpenik: «Azken asteetako borrokari esker matematikako azterketa euskaraz egitea lortu dute. Beste behin, garbi gelditu da ikasleon borrokaren eta presioaren bitartez gure interesak defendatzeko gai garela, baina ez da nahikoa». Hala, IASk «elkartasuna eta elkarlana» antolatzen jarraitzeko deia egin du, eta «doakoa, kalitatezkoa eta unibertsala» izango den «hezkuntza sozialistaren» helburua aldarrikatu.
Horretarako, zenbait mobilizazio egingo dituzte gaur eta bihar artean: gaur Ibaetako eta Gasteizko campusetan eta Nafarroako Unibertsitatean mobilizatuko dira; bihar, berriz, Leioako eta Eibarko (Gipuzkoa) campusetan.
Ikama ere irtengo da kalera
Ikamak ere elkarretaratzeak egingo ditu gaur goizean, 10:30ean, Leioako eta Ibaetako campusetan. Mugimenduak azaldu duenez, mobilizazioen helburua da hezkuntza sistemari «kritika bat» egitea, eta azterketa eredu «zaharkitua eta indibidualista» izango du jopuntuan. Hala, amaiera emango diote fck sele dinamikari.
