Iruñeko Lan Arloko 2. Epaitegiak ezintasun iraunkor absolutua aitortu dio sexu eraso bat jasan zuen Nafarroako Unibertsitate Ospitaleko langile bati. ELA sindikatuak ohar bidez azaldu duenez, erasoa 2022an izan zen, pertsona bat gauez sartu zen ospitalera eta bertako komun publikoetan egin zion eraso emakumeari. «Sexu erasoa lan eremuko indarkeria matxistaren adierazpen larrienetako bat izanik, epai honek garrantzi berezia hartzen du. Enpresen utzikeria agerian uzteaz gain, erreferentziazko aurrekari bat ezartzen du erasoak pairatu dituzten emakumeentzat», erran du sindikatuak.
Adierazi dutenez, epaileak frogatutzat jo du langileak «trauma ondoko estres nahasmendua eta ondorio psikologiko larriak» dituela, «eta horiek erabat baliogabetzen dutela bere lanerako gaitasuna». Hala, epaileak ondorioztatu du erasotuak ezin duela «inolako lanik normaltasunez» egin, eta %100eko prestazioa onartu diote.
Ez da kasuari lotutako lehenbiziko epaia: iazko martxoan Iruñeko Lan Arloko Epaitegiak Osasunbidea eta Arcasa enpresa zigortu zituen; azken horrek kafetegi zerbitzua ematen du Nafarroako Unibertsitate Ospitalean. Bi zigortuei egotzi zieten lan inguruneko gutxieneko segurtasun eta osasun neurriak ez betetzea, kafetegiko langileei komun eta aldagela propiorik ez emateagatik. Langileari zera ordaindu beharko diote: bajan zegoen bitartean —eta lanerako ezintasuna aitortu eta gero— jasotzen dituen prestazioen %30eko gainordaina. Ordu hartan ere ELA sindikatuak ordezkatu zuen langilea epaitegietan.
Azken epaia «biktimarentzako aitortza gisa» definitu du sindikatuak, eta kritiko mintzatu da gizarte segurantzak hasieran izandako jarrerarekin. Izan ere, langileak ezintasun eskaera bide administratibotik egin zuen hasieran, eta hori ukatu zioten. «Horrek epaitegietara jotzera behartu zuen langilea, eta horrek birbiktimizazioa eragin zion, txosten medikuek jaso bezala», borobildu dute.
