Zarautzen, 18 urteko mutil bat espetxeratu dute adingabe bat bortxatzea egotzita. Sopelan, berriz, 21 urteko gizonezko bat atxilotu zuen atzo Ertzaintzak emakume batek salatutako sexu erasoarekin lotuta. Azken hori aske geratu da epailearen aurretik igaro ondoren.
Biak ala biak eraso larritzat jo dituzte mugimendu feministek, eta halakoen aurrean autodefentsarekin erantzuteko deia egin dute. Horiek hala, elkarretaratzeak egin dituzte eguerdian bi herrietan gertatutakoa gaitzesteko. Bai Sopelan eta bai Zarautzen ehunka lagunek egin dute bat salaketarekin.
Udalek elkartasuna helarazi diete bi emakumezkoei, eta dei egin diete herritarrei arbuia ditzatela eraso sexisten "konplizitate keinu guztiak".
