Tolosako (Gipuzkoa) jatorria duen 33 urteko gizon bat hil dute Parisen, hainbat hedabidek jakinarazi dutenez. Astelehen gauean aurkitu zuen haren gorpua Frantziako Poliziak, hura bizi zen etxean; zatikatua zegoen gorpua. Etxeko jabeak aitortu du berak hil zuela; 50 urteko gizona atxiloaldian dago. Ikerketa abiatu du fiskaltzak.
Paris aldirietan dagoen Saint-Denis herrian gertatu zen hilketa zehazki. Le Parisien egunkariaren arabera, hildakoaren izebak eman zuen abisua, haren ilobaren berririk ez zuelako. Sokorri zerbitzuak etxera iritsi zirenean, maizterra aurkitu zuten bertan, eta aurre egin zien. Baina polizia agertu zenean sartzen utzi zien azkenean, eta gorpu zatikatua aurkitu zuten.
Ikerketaren lehen elementuen arabera, istilua izan zuten etxeko jabeak eta maizterrak, eta izandako borrokaren ondotik hil zuen 33 urteko tolosarra. Gorpua desagerrarazten saiatu zen ondotik. «Hilketa eta gorpu bati kalte egitea» leporatuta dago atxiloaldian.
