27 hizkuntza onartzen ditu TripAdvisor atariak, baina bat gehiago ere ez. Alemana, arabiera, txekiera, koreera, txinera, daniera, gaztelania, eslovakiera, finlandiera, frantsesa, greziera, hebreera, hungariera, nederlandera, indonesiera, ingelesa, italiera, japoniera, norvegiera, poloniera, portugesa, errusiera, serbiera, suediera, thailandiera, turkiera eta vietnamera. Hizkuntza horietako testuak onartzen ditu, baina euskarazkorik ez.
Txema Ibarburu erabiltzaileak salatu du webguneak ez duela argitaratu berak euskaraz idatzitako iruzkin bat. Remigio jatetxeari buruz egindako iruzkina bidali zuen hark webgunera, baina hango editoreek jakinarazi zioten ezin zutela argitaratu, ez zegoelako TripAdvisorrek onartutako hizkuntzetakoren batean idatzita. Eta onartutako hizkuntzen zerrenda bidali zioten.
Ibarburu ez da isilik gelditu, eta webguneari erantzun dio esanez ez duela ulertzen ez onartzea iruzkinak "Europan bizirik dagoen hizkuntza zaharrenean".
Ez da TripAdvisorrek euskara erabiltzea galarazten duten aurreneko aldia. Atarian bertan ageri da martxoaren 17an Joseba Santxok idatzitako harridura oharra ere. Getxoko Jolastoki jatetxeari buruz idatzitako iruzkina ez zioten argitaratu, hura ere euskaraz zegoelako.
