Iruñeko ekialdeko Beloso auzoan, giza gorpuzkiak topatu zituzten suhiltzaileek atzo gauean.
Sute bat egon zen inguruan, eta suhiltzaileak joan ziren hara. Utzitako etxola batean topatu zituzten giza gorpuzkiak. Suhiltzaileek foruzainei deitu, eta horiek Auzi Poliziaren taldea mobilizatu zuten. Nafarroako Auzi Medikuntzaren Institutura eraman dituzte aztarnak. Foruzainen arabera, etxerik gabekoek erabili izan dute etxola hori.
Lehen azterketen arabera, aspaldi hildako pertsona batenak lirateke gorpuzkiak, eta, itxuraren arabera, emakumezko batenak.
Gaur goizean ikerketa gehiago egin dituzte inguruan.
Tuteran, duela astebete
Nafarroan antzeko beste aurkikuntza bat egin zuten duela astebete. Maiatzaren 25ean, gizonezko baten gorpua topatu zuten suhiltzaileek Badina izeneko eremuan. Hilotza erreta zegoen. Foruzainen arabera, litekeena da gizona hamar egun lehenago hil izana, inguruko basoan pizturiko sutean.
Hildakoa jatorriz Beasaingoa zen (Gipuzkoa), eta 70 urte zituen.
Maiatzaren 14an etxegabe baten gorpua aurkitu zuten Orkoienen (Nafarroa), zaborra biltzeko kamioi batean. 27 urte zituen gazteak, eta Madrilgoa zen sortzez, baina asteak zeramatzan Nafarroan.
Martxoaren 12an, 23 urteko etxegabe bat hilda aurkitu zuten Bilboko Uribarri auzoan.
Urtarrilean, etxerik gabeko 56 urteko gizonezko bat hilik agertu zen auto baten barruan, Hendaiako Kaneta auzoan.
