Euskarari Puzka kanpainaren zazpigarren aldia aurkeztu du Errigora egitasmoak Iruñeko Katakrak liburu dendan. Agerraldia ekinbidea izanen da aurtengo berritasun nagusia. Horren bidez, Errigorak jasotako ekarpen ekonomikoen zati bat bideratuko du Nafarroako hegoaldean euskara sustatzeko: «Euskara jende gehiagok ezagutu, erabili eta estimatu dezan eragin nahi dugu. Nafarroako erriberan eta erdialdean euskararen aldeko proiektu zaharrak indarberritu eta berriak sorraraziko dituen olatua sortu nahi dugu», azaldu dute antolatzaileek.
Horretarako, azaroaren 20ra arte, Nafarroan ekoitzitako produktuz hornitutako saskiak jarriko dituzte salgai 700 salmenta puntutan eta www.errigora.eus webgunean.
