Unai Lopez de Okariz euskal presoak Espainiako auzitegiek ezarritako zigor osoa bete du, eta, horrenbestez, aske geratu da. Hala jakinarazi du Etxerat elkarteak. Lopez de Okariz gasteiztarra 2001eko abuztuan atxilotu zuen Guardia Zibilak, Katalunian. Nerea Bengoa eta Fernando Garcia Jodrarekin batera, ETAko talde bat osatu izana leporatu zioten. Aurretik ere kale borrokan aritu izana egotzi zion Espainiako Auzitegi Nazionalak.
Zigor luzea bete du espetxean: 23 urte inguru; eta epe horretako zatirik handiena Euskal Herritik urrun eman du, Granadako Albolote espetxean hain zuzen ere. Han zegoela, haren bi lagunek auto istripu bat izan zuten bisita batetik Euskal Herrirantz zetozela, Toledo inguruan, 2009an.
Granadatik Zaragozako Darocara lekualdatu zuten Unai Lopez de Okariz, 2019an, eta bi urte geroago Euskal Herriratu zuten, Zaballara ekarrita. 2022ko uztailean, hirugarren gradua onartu zioten, eta 2024ko irailean, berriz, baldintzapeko askatasuna.
