USE unibertsitatean sartzeko ebaluazioa egingo dute asteon Hego Euskal Herriko 17.469 ikaslek. Hain zuzen, NUP Nafarroako Unibertsitate Publikoan gaurtik etzira egingo dituzte probak; EHU Euskal Herriko Unibertsitatean, bihartik ostiralera. Gehienek euskaraz egingo dituzte etsaminak: ikasleen %62k. Eredu zaharreko azken USE izango da; aldaketak egongo dira datorren ikasturtetik aurrera.
Aurten ere bada nobedaderik, ordea: aurten ikasleek Espainiako Historia edo Filosofiaren Historia aukeratu beharko dute. Gainontzean, pandemian ezarritako eredua mantenduko dute, ordura arte baino malguago.
Aldaketa nagusiak datorren USEan sartuko dira indarrean: kohesioa; koherentzia; aurkezpena; eta zuzentasun gramatikala, lexikoa eta ortografikoa notaren %10 izango da. Gainera, ikasgai bakoitzerako azterketa eredu bakarra egongo da, eta konpetentzialagoak izango dira.
