Egunak zeramatzaten Espainian Miarritzeko ekitaldian parte hartu zutenen atzetik. Aurreko astean Carlos Urkijo Espainiako Gobernuaren ordezkariak Frantziari eskatu zion kitatu gabeko auziak zituztenak atxilotzeko, eta eskatu bezala egin du Frantziak orain. Aranaldek euroagindu eskaera zuela argudiatu dute atxiloketa gertatu berritan. Hilaren 15az geroztik ez da hori eskatu duen bakarra izan Urkijo, hala ere.
"Ondorioak" eskatu zituen Urkijok, zehazki. "Pentsatzen dut Frantziako poliziak ondo jasoko zuela gertatutakoaren berri. Eta noski, atxiloketak egiteko, atxiloketak egin behar badira, momentu egokia ez da ehunka pertsona ekitaldi bat egiten ari direnekoa. Pentsatzen dut datozen egunetan ondorioren bat egon beharko duela antolatzaileekin edo parte hartzaile batzuekin lotuta".
Urkijorekin bat egin zuten AVTk, Dignidad y Justiciak, Covitek eta Miguel Angel Blanco Fundazioak. Miarritzeko ekitaldian terrorismoa goratu zela esan zuten, gainera, eta neurriak eskatu zituzten horiek ere. La Razón Espainiako egunkariaren arabera, ekitaldia parte hartu zutenak ikertzen aritu da Frantzia.
