Euskal Herriko sindikatuek lanuzte orokorrera deitu dute heldu den urriaren 15erako. Helburu bakarra du ekinaldiak: Israel Palestinan egiten ari den genozidioa salatzea eta Euskal Herriko enpresen eta instituzioen inplikazioa salatzea. Bada, Ikama ikasle antolakundeak gaur jakinarazi du bat eginen duela geldialdiarekin, eta grebara deitu ditu ikasleak: «Gure egitekoa da nazio mailako zein nazioarteko erakunde, enpresa eta instituzio konplize seinalatzea eta presionatzea».
Halaber, palestinar ikasleei «aitortza berezia» egin nahi dio Euskal Herriko ikasle mugimenduak, eta exijitu dute ikastetxeak berreraiki egin behar direla Palestinan, baita ikasleek merezi duten hezkuntza bermatu ere. «Era berean, Palestinako nazio askapeneko mugimenduari babesa eta elkartasuna adierazi nahi diogu», erran du Ikamak.
Urriaren 15ean, beraz, «borroka» eguna izanen da Ikamakoentzat ere. Adierazi dutenez, sindikatuen deialdietara joan aitzinetik —12:30ean hasiko dira— egitarau bat prestatuko dute, eta Hego Euskal Herriko hiriburuetako mobilizazioetan «ikasle blokeak» eginen dituzte.
