Usansolok bere etorkizuna erabakitzeko kontsulta prozesua babestu du Galdakaoko Udalak. Galdeketa sustatzen dutenei azaldu die "konplikatua" izango dela azaroaren 23rako guztia prest izatea, haiek proposatu duten moduan, baina kontsulta bultzatzearen alde agertu da. "Bide orri bat" proposatu die.
Kontsultaren bultzatzaileekin elkartu zen atzo Ibon Uribe alkatea (EAJ), eta ondoren kaleratutako ohar batean jakinarazi zuenez, astelehenean bilduko dira berriro. Egun horretan alkateak mahai gainean jarritakoa izango dute hizpide. Era berean, Uribek osoko bilkurara eramango du gaia, eta galdeketaren xehetasun teknikoak lantzen hastea proposatuko du.
Uriberen arabera, prozesua "konplexua" da, eta, beraz, alde guztiek parte hartu beharko lukete galdeketaren "legezkotasuna, gardentasuna eta sinesgarritasuna bermatzen".
