Uztaritzeko (Lapurdi) San Frantses Xabierkoa kolegioko matematika irakasle bat epaituko dute abenduaren 9an, Baionako Auzitegian. Emakumezko lau lankideri sexu jazarpena egitea leporatzen diote, eta, horretaz gain, jukutria bidez lankideen argazkiak lapurtzea ere bai.
2019 eta 2024 artean gertatu ziren egozten dizkioten delituak. Ici Pays Basqueren arabera, 54 urteko gizonezkoak partez onartu ditu leporatzen dizkiotenak. Haatik, ez dute atxiki haurrei eraso egin izanaren akusazioa.
Alta, irrati publikoak ostegun honetan atera duen informazioaren arabera, lankideekin ez ezik, ikasleekin ere izan zituen jarrera desegokiak. Hainbat gurasok baieztatu dute aspalditik emana zutela abisua, eta haurrekin izandako jarrerei eta egindako komentarioei buruzko lekukotasunak eman dituzte: neskatoei ipurdia begiratzeko joera zuela aipatu dute, eta konnotazio sexualeko komentarioak egiten zituela, besteak beste.
Kolegioko zuzendariaren hitzetan, abisua emana zien bai elizbarrutiari eta baita errektoretzari ere.
