"Ezustean, baina oso pozik" jaso du BERRIA egunkariko Xabier Martinek zientzia kazetaritzari lotutako 2010eko CAF-Elhuyar saria. Neandertalaren genomaren deskodetzearen ondoren idatzitako artikulu batengatik eman diote —Kate bereko begiak-engatik—.
Arratsaldean banatu dituzte sariak Usurbilen. Joxerra Etxebarria EHUko irakasleak merezimenduzko saria jaso du, urteetan zientziaren euskarazko dibulgazioan egindako lanagatik. Batik bat, hezkuntza alorrean aritu da. Aitzindaria izan zen EHUko Zientzia fakultatean euskarazko eskolak ematen.
Dibulgazio artikuluen alorrean Jose Mari Rivadeneyra nabarmendu dute, doktore tesiarenean Naroa Aldanondo eta gazteenan Aitzol Lasa.
