Gurasoak banandu edo dibortziatu egiten diren kasuetan seme-alaben zaintza partekatua lehenetsiko duen legea garatzeko ekimenak hasiko ditu aste honetan Kidetzak, Euskadiko Guraso Bananduen Federazioak. Oinarrizko testu bat idatzi du, eta aste honetan Eusko Jaurlaritzari zein Eusko Legebiltzarreko taldeei emango die zaintza partekatuko legea bultza dezaten. Horrez gain, herri ekimen legegilea hasteko asmoa ere agertu du Kidetzak.
Aste honetan banatuko den testuak lau oinarri dituela nabarmendu du kidetzak: gurasoen erantzukidetasuna, adingabeak zaintza partekaturako duen eskubidea, adingabeak bi gurasoekin harremanak berdintasunean izateko duen eskubidea eta emakume eta gizonen arteko berdintasun printzipioa. Legea aurrera eramateko "bide guztietan" lanean ari dela azaldu du Justo Saenz Kidetzako presidenteak, eta legea legegintzaldi honetan onartzea nahi dutela gaineratu du.
