Espainiako Barne Ministerioak jakinarazi duenez, Espainiako Poliziak gizakien salerosketarako eta lan ustiapenerako erakunde bat desegin du Bizkaian, eta zazpi pertsona atxilotu dituzte.
Biktima gehienak gizonezkoak dira, eta sarearen ustezko arduradunei 8.000 eta 10.000 euro artean ordaintzen zizkieten haiek Pakistandik garraiatzeagatik. Bizkaiko hainbat etxetan zeuden erroldatuak; aurrez 3.000 euro ordaindu behar zituzten, eta, Barne Ministerioko oharrak dioenez, Bizkaiko fruta dendetan lan egiten zuten, kontraturik gabe eta gizarte segurantzan izena eman gabe. Hiru urte igaro ondoren, kontratupeko lanpostu bat eskaintzen zieten beste 8.000 euroren truke, Espainian bizileku txartela eskuratu ahal izateko, betiere oharrak dioenez.
Guztira zazpi pertsona atxilotu dituzte: hiru Gernikan, beste hiru Bermeon, eta bat Mungian. Gainera, miaketak egin dituzte Bizkaiko lau udalerritako zenbait etxetan; besteak beste, bi Gernikan eta bi Bermeon. 93.522 euro, dokumentazioa eta sakelako telefonoak atzeman dituzte operazioan.
