Zerbitzuak ixtea. Zimurtu gabeko oheak: hutsak

Ez oporretan bakarrik. Bestelako sasoietan ere izaten dira ohe eta plantak ixteko erabakiak, eta askotan gertatzen da pertsonalean dauden arazoengatik. Eta irudi lotsagarriak ikusi dira: oheak korridoreetan». Osaldeko presidente Juan Luis Uriak berretsi egin du sindikatuetatik hainbatetan egiten den kritika: ohe eta plantak itxi egiten dituztela osasun zerbitzuek, bai Osakidetzak, eta bai Osasunbideak. LABeko ordezkari Edurne Agirreren arabera, oporretan izaten dira horrelakoak ohiko, batez ere. «Zenbait garaitan, opor sasoietan-eta, oheak ixten dituzte dirua aurrezteko neurri gisara», azaldu du. Aldiz, zenbait sendagileri arratsaldetan ebakuntzak egiteagatik pagatzen zaien aparteko diruarekin sasoi horietan instalazioak ez ixteko adina diru balegokeela nabarmendu du ELAko kide Pello Igeregik, eta, hartara, sasoi horietan ere jardun betean jarraituko ahal izango lukeela osasun sistemak. «Arazo estruktural bat daukagu: ohe falta. Opor sasoian, berriz, langileak ez ordezkatzeko oheak ixtea erabakitzen da. Azken Gabonetan, 701 ohe itxi zituzten». Eta pazienteak, zain. Administrazioak, aldiz, kontrara jokatzea «diru publikoa xahutzea» dela uste du.