Zinegotzien segurtasuna bermatuko duela ohartarazi du Cabiecesek

Ane Carrere Andoaingo alkateak aurreko astean emandako aginduak jarraituta, atzo udaltzainek ez zieten bizkartzainei udaletxean sartzen utzi. Alkatearen erabakiak armei buruzko araudiaren 137/1993 dekretua du oinarri. Egoitza publikoetan eta batzar etxeetan armak eramatea debekatzen du dekretu horrek, eta alkateari ematen dio salbuespenak ezartzeko eta zinegotzien segurtasuna bermatzeko ahalmena. Atzo, PPko eta PSE-EEko zinegotzi banaren bizkartzainak udaletxe kanpoan geratu ziren, eta udaltzainek lagunduta sartu ziren zinegotziak udaletxera.

Bilduko hainbat alkate bizkartzainen inguruan hartzen ari diren erabakiak «oker argia» direla esan zuen Mikel Cabieces Espainiako Gobernuak EAEn duen ordezkariak. «Gobernuak ez du onartuko segurtasunaren eremuan hutsunerik egon dadin; beharrezko neurriak hartuko ditu, eta betebeharrak betetzeko exijituko die udalei».