Irailaren 24an, Orioko itsaso aldeko portuan, Ondarroako (Bizkaia) Gure Gaskuña itsasontziak su hartu zuen. Berrogei egun baino gehiago igaro ostean, oraindik erdi hondoratuta dago, eta Orioko Udalak eskatu dio Eusko Jaurlaritzari «lehenbailehen» irtenbidea emateko egoerari. Horrez gain, nabarmendu du azken egunetan kezka areagotu dela herritarren artean, erregaiak eragindakoak izan daitezkeen orbanak eta usainak antzeman direlako.
Udalak informazio zehatza eskatu dio Jaurlaritzari honako gai hauen inguruan: ontziaren egungo egoera, orain arte egindako azterketak eta jarduketak, egon daitezkeen ingurumen arriskuak, hartu dituzten prebentzio neurriak, eta itsasontzia lehorreratzeko edo lekualdatzeko epeak.
Kritiko agertu dira orain arte egindako kudeaketarekin. Erakundeak, besteak beste, azaldu du Eusko Jaurlaritzari hainbat aldiz eskatu diotela egoeraren inguruko informazioa, baina beti erantzun dietela «kontrolpean» dagoela.
Azken egunetan, EAEko Angularien Elkarteak ere hitz egin du Gure Gaskuña itsasontziari buruz. Adierazi dute ontzian izandako suteak «kutsadura larria» eragin zuela estuarioan, eta gaur egun gasolioa erauzteko egiten ari diren lanek egoera okertu dutela.
